ਇੰਡਸਟਰੀ ਨੂੰ ਸਰਕਾਰ ਦਾ ਝਟਕਾ, 28 ਮਾਰਚ ਤੋਂ ਵੱਡੇ ਉਦਯੋਗ ਲਈ ਬਿਜਲੀ ਹੋਈ 60 ਪੈਸੇ ਮਹਿੰਗੀ, ਜਾਣੋ ਨਵੀਆਂ ਦਰਾਂ ਬਾਰੇ

Punjab News : 20 ਲੱਖ ਪ੍ਰਤੀ ਮਹੀਨਾ ਬਿਜਲੀ ਦਾ ਬਿੱਲ ਭਰਨ ਵਾਲੀ LS ਯੂਨਿਟ ‘ਤੇ 2 ਲੱਖ ਰੁਪਏ ਦਾ ਬੋਝ ਵਧਿਆ। ਜੇ ਸ਼ਹਿਰ ਦੇ ਵੱਡੇ ਉਦਯੋਗ ਦੀ ਗੱਲ ਕਰੀਏ ਤਾਂ ਇਕ ਇੰਡਸਟਰੀ ਨੂੰ ਹਰ ਮਹੀਨੇ ਘੱਟੋ-ਘੱਟ 20 ਲੱਖ ਰੁਪਏ ਦਾ ਬਿੱਲ ਆਉਂਦਾ ਹੈ। ਜਿਸ ਵਿੱਚ ਹੁਣ 60 ਪੈਸੇ ਦੇ ਵਾਧੇ ਨਾਲ ਬਿੱਲ 22 ਲੱਖ ਰੁਪਏ ਪ੍ਰਤੀ ਯੂਨਿਟ ਆ ਜਾਵੇਗਾ। ਅਜਿਹੇ ‘ਚ 2 ਲੱਖ ਰੁਪਏ ਪ੍ਰਤੀ ਯੂਨਿਟ ਬਿਜਲੀ ਦੇ ਬਿੱਲ ਦਾ ਵਾਧੂ ਬੋਝ ਹੈ। ਇਸ ਕਾਰਨ 408 ਵੱਡੇ ਯੂਨਿਟਾਂ ਨੂੰ ਹਰ ਮਹੀਨੇ 8.16 ਕਰੋੜ ਰੁਪਏ ਵਾਧੂ ਭਰਨੇ ਪੈਣਗੇ। ਇਸੇ ਤਰ੍ਹਾਂ ਬਿੱਲ ਵਿੱਚ 44 ਪੈਸੇ ਦੇ ਵਾਧੇ ਕਾਰਨ 1 ਲੱਖ ਰੁਪਏ ਪ੍ਰਤੀ ਮਹੀਨਾ ਬਿੱਲ ਵਾਲੀ ਯੂਨਿਟ ਨੂੰ 7333 ਰੁਪਏ ਦਾ ਵਾਧੂ ਬਿੱਲ ਅਦਾ ਕਰਨਾ ਪਵੇਗਾ। ਇਸ ਨਾਲ ਹੀ ਸ਼ਹਿਰ ਦੀਆਂ 4040 ਯੂਨਿਟਾਂ ‘ਤੇ ਪ੍ਰਤੀ ਮਹੀਨਾ 2.96 ਕਰੋੜ ਰੁਪਏ ਦਾ ਬੋਝ ਵਧੇਗਾ। ਇਸੇ ਤਰ੍ਹਾਂ ਛੋਟੇ ਬਿਜਲੀ ਯੂਨਿਟਾਂ ਦੇ ਮਾਲਕਾਂ, ਜੋ ਔਸਤਨ 25 ਹਜ਼ਾਰ ਮਹੀਨਾਵਾਰ ਬਿੱਲ ਅਦਾ ਕਰਦੇ ਹਨ, ਦੇ ਬਿੱਲਾਂ ਵਿੱਚ 44 ਪੈਸੇ ਦੇ ਵਾਧੇ ਕਾਰਨ 1833 ਰੁਪਏ ਵਾਧੂ ਹੋਣਗੇ। ਇਸ ਨਾਲ ਸ਼ਹਿਰ ਦੇ 10750 ਛੋਟੇ ਬਿਜਲੀ ਯੂਨਿਟਾਂ ਦੇ ਮਾਲਕਾਂ ‘ਤੇ ਪ੍ਰਤੀ ਮਹੀਨਾ 1.97 ਕਰੋੜ ਰੁਪਏ ਦਾ ਬੋਝ ਵਧ ਗਿਆ ਹੈ। ਜਲੰਧਰ ਫੋਕਲ ਇੰਡਸਟਰੀਜ਼ ਐਸੋਸੀਏਸ਼ਨ ਦੇ ਮੁਖੀ ਸੁਨੀਲ ਸ਼ਰਮਾ ਦਾ ਕਹਿਣਾ ਹੈ ਕਿ ਸਰਕਾਰ ਮੁਫਤ 600 ਯੂਨਿਟਾਂ ਦਾ ਬੋਝ ਸਨਅਤਕਾਰਾਂ ‘ਤੇ ਪਾ ਰਹੀ ਹੈ। ਸਬਸਿਡੀ ਦਾ ਬੋਝ ਸਰਕਾਰ ਨੂੰ ਆਪਣੇ ਵਧੇ ਹੋਏ ਮਾਲੀਏ ਤੋਂ ਦੇਣਾ ਚਾਹੀਦਾ ਹੈ। ਸਰਕਾਰ ਨੇ ਬਿਨਾਂ ਕਿਸੇ ਜਾਣਕਾਰੀ ਤੋਂ ਲੋਕਾਂ ਦੀ ਜੇਬ ‘ਤੇ ਬੋਝ ਪਾ ਦਿੱਤਾ ਹੈ ਜੋ ਕਿ ਸਰਾਸਰ ਗਲਤ ਹੈ।